पोखरा, वैशाख ।
राष्ट्रिय परीक्षा बोर्डले सञ्चालन गरेको माध्यमिक शिक्षा उत्तीर्ण परीक्षा अर्थात कक्षा १२ को परीक्षा देशभर एकै साथ सुरु भएको छ । परीक्षा यही वैशाख २२ गते संचालन हुनेछ । परीक्षामा आज परिक्षार्थीहरुले अंग्रेजी विषयको परीक्षा दिएका बोर्डका परीक्षा नियन्त्रक सन्तोष अर्यालले जानकारी दिनुभयो ।
शिक्षा ऐनको आठौँ संशोधनले विद्यालय शिक्षाको संरचनामा गरेको परिवर्तनपछि पहिलो पटक भएको यो परीक्षालाई माध्यमिक शिक्षा उत्तीर्ण परीक्षा अर्थात एसएलसिई परीक्षा भनिएको छ । विगतका वर्षमा कक्षा १० मा सञ्चालन हुँदै आएको माध्यमिक शिक्षाको अन्तिम परीक्षा अर्थात एसएलसी’ ऐन संशोधन भएसँगै यस वर्षदेखि कक्षा १२ मा भएको हो ।


देशभरका ९ सय ९० परीक्षा केन्द्रबाट तीन लाख ५३ हजार १२ परीक्षार्थीहरु परिक्षामा सामेल भएका छन् । परीक्षामा एक लाख ७६ हजार छ सय १२ छात्र र एक लाख ७६ हजार चार सय छात्रा सहभागी छन् । कक्षा १२ मा ९८ फरक फरक विषयको परीक्षा भएको छ । परीक्षामा ३५ हजार सात सय जनशक्ति परिचालन गरिएको छ । राष्ट्रिय परीक्षा बोर्डले लिने कक्षा १२ को परीक्षालाई नै एसएलसिई परीक्षाका रुपमा पहिलो पटक सञ्चालन गरिएको परीक्षा नियन्त्रक अर्यालले जानकारी दिनुभयो ।
परीक्षा सम्पन्न भएको ९० दिनभित्रै नतिजा सार्वजनिक गरिने बताइएको छ । परीक्षामा मोबाइल फोन लैजान निषेध गरिएको, सूचना आदानप्रदान गर्न परीक्षा कन्ट्रोल रुमको व्यवस्था गरिएको, कम श्रवणशक्ति भएका, दृष्टिविहीन वा सुस्तःमनस्थिति वा अन्य प्रकृतिको अपांगता भएका परीक्षार्थीका लागि विशेष व्यवस्था गरिएको, कारागार वा बालसुधारगृहमा रहेका परीक्षार्थीलाई परीक्षा दिने व्यवस्था मिलाइएको छ । परीक्षामा अमर्यादित काम गरेको पाइएमा छ महिना कैद र एक लाखसम्म जरिवाना गरिने भएको छ ।

तपाईको प्रतिक्रिया

सम्बन्धित समाचार